O camiño que percorre o espazo arqueolóxico-natural do Freixo discorre por unha zona de especial beleza natural, colgada sobre o río Arnoia, e que une dous símbolos da prehistoria e da historia da comarca e de Galicia en xeral.
Por unha banda, o petróglifo das Barroncadas é un exemplo excepcional da arte rupestre do interior, onde os motivos zoomorfos e figurativos están completamente ausentes e predominan os deseños xeométricos e, máis concretamente, os conxuntos de círculos concéntricos como os que atoparemos nas Barroncadas. .
Por outra, a magnífica ponte romana, un dos poucos exemplos plenamente conservados en Galicia deste tipo de obras de enxeñería, que demostra a total integración do territorio galego na organización política e económica romana.
Trátase dun pequeno camiño lineal sinalizado de 1,9 quilómetros de lonxitude e apto para todos os públicos. Despois de percorrer o primeiro quilómetro, existe a posibilidade de desviarse do camiño principal para visitar o Penedo de Nuestra Señora e gozar dunha panorámica excepcional do val.
Explora e descubre os nosos roteiros de sendeirismo
