Na parroquia de Baños (Bande) atopamos unha das xoias arqueolóxicas de Terra de Celanova-Serra do Xurés, o complexo arqueolóxico romano Aquis Querquennis. É un dos recursos máis relevantes de toda a provincia de Ourense, declarado Ben de Interese Cultural. Nel podemos distinguir tres zonas: o campamento militar, de deseño clásico (forma rectangular e dúas rutas ortogonais principais, cubrindo unha superficie de 3 hectáreas), un dos principais da Península Ibérica e tamén coñecido como “A Cidá”, “A Cibdade” ou “A Cidade”; a mansión viaria (pousada) e as termas. Ditas termas poden ser usadas na actualidade.
Aquis Querquennis
Preto dos anos 50 (1948) a compañía hidroeléctrica Fenosa alagou o val do Limia para construír o encoro das Conchas, polo que as antigas termas caeron en desuso despois de dita construción. A mediados dos anos 70 iniciáronse as tarefas de escavación e recuperación do complexo.
A día de hoxe o xacemento está situado nunha zona de risco de inundacións, polo que non é accesible durante todo o ano, e os turistas dependen do nivel da auga para poder gozar destes restos. Nas inmediacións do complexo existe un centro de interpretación (Aquae Querquenna-Vía Nova), lugar de recepción e información sobre os recursos deste lugar. Tamén no mesmo centro pódese atopar o museo de Quarquenia (rexión da Baixa Limia), con mostras da etapa máis antiga (desde a Prehistoria á Idade Media).
Unha visita que non vos podedes perder se vos desprazades a este xeodestino, xa sexa para descubrir restos históricos, gozar da calma desta paisaxe ou darvos un baño nas termas e beneficiarvos así das propiedades das súas augas mineromedicinais.
